عبد الرحمن بن حاشر يكتب قصيدته على لساني !!
تستقبل بعمرك سنة واودع بعمري سنين
وتقولي لي ليش النكد
ليش إنت هالليلة حزين
وأقول بدموع الكلام
هالعام ما مر بسلام
هالعام سهرني ونام
شابت ذوايب فرحتي
وبشفتي
دفنت أنا وجه الفرح
اللي من كثر همي انجرح
من بعد ما عني رحل
خذ من حياتي كل شي حتى البكا والإبتسام
يا صاحبي..
هو أي عام أقبل وغادر أي عام
كيف احتفل وياك بالعام الجديد
ومامن جديد
إلا الحزن كل عام في عمري يزيد
والهم هو ضيفي الوحيد
اللي من دلالي يقول هل من مزيد
يا صاحبي..
كيف احتفل وياك واودع سنة
عمرك سمعت بواحد ودع بيوم واحتفل
عمرك سمعت بواحد يضحك إذا عمره رحل
يا صاحبي..
تعال ببكي معك على الشباب اللي يفوت
والعمر اللي فينا يموت
إن كنت ناوي تحتفل بمرور أو بقدوم عام
من روزنامة عمرنا طاحت سنة
يعني الخريف يعني الصفار
يعني السنين بعمرنا صارت تهيف
وين الربيع اللي تعيشه من سنين
ليش لطفولتنا نسافر بالحنيني
يا صاحبي..
من روزنامة عمرنا تتساقط أيام وشهور
من عمرنا نأخذ بطاقات المرور
إلى القبور
يا صاحبي هذا احتفالي والسلام
لا تحتفل مثلي إذا ودعت عام
ولا تفرح إن قابلت عام
روح احتفل بالدمع في عينيك ونام
بس ادعي ربك يجعله في عمرنا يمر بسلام
ليست هناك تعليقات:
إرسال تعليق