ثرثرة .. إلى ان يأتي موعد الدواء !!!

اممممم .. عن ايش اكتب ؟!

ما ادري إذا كنتوا تعرفوا إحساس انه ودك تكتب شئ ..

وبنفس الوقت ما عندك فكرة تكتب عنها خخخ

احيانا احس انه فيني طاقه للكتابة وإلهام فضييييع .. بس المشكلة دائما في الفكرة ..

الحين فتحت هالصفحه وقلت بكتب وبشوف لين بوصل !!!

الحين الساعه عندي بتوقيت كمبيوتر أختي 5:75 صباحاً

الكل نايم .. وانا منتظرة تجي الساعه 6 ونص عشان اخذ جرعة المضاد الحيوي لضرسي ..

من امس منفووووووخ هههه .. اول مره ينتفخ لي ضرس ( فرحانه بوجهي كمان هههه )

يآآآلله قد ايش حاسه اني سخييييفه وانا اكتب هالكلام !!

بس عن جد طول هالآسبوع كنت مريضة .. وكنت موقفه العمل في مشروع تخرجي .. لأنه مافيني ادرس شئ !!

امس ما قدرت انام من الآلم .. طول الليل وانا افتش في الثلاجة واجرب أدوية .. حتى أدوية الأطفال جربتها !!

بعدين جلست شويه انتظر عشان الدواء يأخذ مفعوله .. وقعدت أفكر ..

انه قد ايش نعمة الصحة عظييييمة .. واحنا ما نفكر فيها

كل يوم ارجع من الجامعة واناااااام .. ولا احس بشئ .. واصحى وانا بكامل صحتي . ( الحمدلله )

ومع هذا طول اليوم وانا اتذمر .. من الدراسة .. من الجو .. من الآكل .. من الطفش .. من .. مـــن !!!!!!!

وفيه ناس يباتوا ليلهم وهم يتوجعوا ما يقدروا يناموا !!!

في ناس عايشين ع المسكنات طول حياتهم ..

وانا مو قادرة اصبر عليها يومين بس !!

وفي ناس طول حياتهم عايشين ع الأسره ما يقدروا يحركوا اي عضو في جسمهم !!!

يآآآآآلله ما اعظم نعمة الصحة ...

وقد ايش احنا غاااافلين عنها

احيانا افكر انه سبحان الله الرزق موزع ع الناس بالتساوي .. وهذا شئ مفروغ منه !!

ويمكن لو الله اعطاني كل اللي احلم فيه ..

يمكن اكون مضطرة ادفع ثمن هذه الأحلام !! <<< استغفر الله

عشان كذا في كثيرين عايشين بنعمة .. ومع هذا اوضاعهم الصحية سيئة جداااُ ..

وأغلب فلوسهم تروح في المستشفيات

وفي ناس عايشين في كومة قش ..

وعايشين بسعادة ما يعلم فيها إلا ربنا !!

سبحان الله !!

يمكن الخطأ فينا دائما لما نتعرض لأي مشكلة انا ننظر للمشكلة فقط .. وما نفكر في علاجها ابداً !!

يعني في كثير اشخاص تعرضوا لمحن .. ومع هذا نظروا للمحنه من جانب آخر حتى حولوها لمنحة !!

اليوم اختي كانت تحكيني قصة قرأت عنها ..

تقول انه كان فيه شاب ملتزم ومستقيم .. والكل يشهد له بحسن الخلق ..

عاش طول حياته وهو يدرس ويحاول يتخرج من الكلية العسكرية عشان يشتغل .. ولما تخرج .. وبدأ يشتغل بأول شهر ..

صابته انفلونزا قوية جداً .. تسببت له بشلل كلي ..

فكان لما احد يزوره ويحاول يواسيه ..

كان يقول لا تواسوني .. أنا الحين بأحسن حال ..

عشت حياتي كلها وانا منشغل وغافل .. وما كنت افكر بحفظ القرآن ..

يمكن الله اقعدني عشان احفظ كتابة !!

وفعلاً بدأ يحفظ القرآن ..

وكان حالته الصحية تتحسن تدريجياً .. حتى انهى حفظ القرآن مع إمتثاله للشفاء بشكل كااااامل .. وعاد إلى حياته الطبيعيه !!

وفي كثييير قصص من هالنوع

قصة المخترع السعودي مهند ابو ديه

فيها مثال كبييير جداً ع قوة الهمه والإرادة اللي فعلاً تصنع المعجزات ( بحاول اكتب قصته هنا لآحقاً لكل اللي ما يعرف عنه )

بس ليش هالآشخاص نادرين جداً

ليش هم اللي وصلوا لهذا المستوى من الطموح والعزيمة !!

ليش احنا سلبين لهذه الدرجة !!

والله رحمة ربنا وااااسعة وعظيييمة !!

احنا بس لو تأملنا في معاني هذه الآية الكريمة : { وَقَالَ رَبُّكُمُ ادْعُونِي أَسْتَجِبْ لَكُمْ }

ادعوني .. استجب ...

يعني ملازمة الدعاء للأجابة ..

عشان كذا كمان كان سيدنا عمر يقول ( أنا لا أحمل هم الإجابة ولكن أحمل هم الدعاء )

الله ما يضيع احد ..

لو أخذنا بالأسباب ودعينا .. وفوضنا امرنا إليه ..

لاااااااازم نكون ع ثقه انه ما رح يضيعنا .. اكيييد !!!

لكن لو تسلسل إلى انفسنا شئ من الشك في قدرة الله .. او في واسع رحمته ..

لازم نكون ع يقين انه الله ما رح يستجيب دعائنا !!

ادعي بالصيغة العامة .. اختلي بنفسك في الثلث الآخير من الليل ..

وخاطب الله بلغتك .. واشكي له همك وحزنك !!

اشكي للي ما ينقطع منه رجاء احد

وكن ع يقيين انه يسمعك .. وانه ما رح يردك

{إن الله يستحي إذا رفع العبد إليه يديه أن يردهما صفراً }

يآآآآآلله ما اعظمك ...

~~~~

عن كم موضوع انا تكلمت فوق .. ما حسيت بنفسي .. جات الساعه سته ونص .. موعد الدواء ..

تصبحوا ع خير